நெல்லை வரும் வந்தே பாரத் ரயில்: அமைச்சர் எல்.முருகன் அறிவிப்பு!

தமிழ்நாட்டுக்கு வர உள்ள புதிய ரயில்வே திட்டங்கள் குறித்து ஒன்றிய இணை அமைச்சர் எல்.முருகன் பட்டியலிட்டார்.

சென்னை – திருநெல்வேலி இடையே விரைவில் வந்தே பாரத் ரயில் இயக்க நடவடிக்கை எடுக்கப்படும் என ஒன்றிய இணை அமைச்சர் எல்.முருகன் கூறினார்.

திண்டுக்கல் மாவட்டம் கொடைரோடு ரயில் நிலையத்தில் குருவாயூர் – சென்னை எக்ஸ்பிரஸ் ரயில் நின்று செல்லும் நிகழ்வின் தொடக்க விழா நடைபெற்றது.

ஒன்றிய இணை அமைச்சர் எல்.முருகன் கொடைரோடு ரயில் நிலையத்தில் குருவாயூர் – சென்னை ரயில் நின்று செல்லும் நிகழ்வை தொடங்கி வைத்தார். நிகழ்ச்சிக்கு மதுரை கோட்ட ரயில்வே மேலாளர் பி.அனந்த் தலைமை வகித்தார். ப.வேலுச்சாமி எம்.பி. முன்னிலை வகித்தார்.

அப்போது பேசிய அமைச்சர் எல்.முருகன், “தமிழகத்தில் மேற்கொள்ளப்படும் ரயில்வே திட்டங்களுக்காக இதுவரை இல்லாத வகையில் நடப்பு நிதியாண்டில் ரூ.6,080 கோடியை மத்திய அரசு ஒதுக்கியுள்ளது.

73 ரயில் நிலையங்களை சர்வதேச தரத்துக்கு உயர்த்த நடவடிக்கை எடுக்கப்பட்டுள்ளது.

மதுரை ரயில் நிலையத்துக்கு மட்டும் ரூ.413 கோடி ஒதுக்கப்பட்டுள்ளது.

ஒதுக்கப்பட்டுள்ளது. இதில் பழநி – ஈரோடு புதிய ரயில் பாதை திட்டமும் அடங்கும். மதுரை – அருப்புக்கோட்டை – தூத்துக்குடி ரயில் பாதை அமைக்கவும் நடவடிக்கை எடுக்கப்பட்டு வருகிறது.

சென்னை – திருநெல்வேலி இடையே விரைவில் வந்தே பாரத் ரயில் இயக்கப்பட உள்ளது” என்று கூறினார்.

அம்மையநாயக்கனூர் பேரூராட்சித் தலைவர் செல்வராஜ் உள்ளிட்டோர் நிகழ்ச்சியில் கலந்துகொண்டனர். மதுரை ரயில்வே கோட்ட மூத்த வணிக மேலாளர் ஆர்.பி.ரதிப்பிரியா நன்றி கூறினார்.